Secò ‘l busard - carraraonline.com

I veci i dizev’n che a memoria d’om, nissun i s’arcordav un’stata cussì calda.
Secò i s n stev stranat sot al perg’l, apena fora d’ara, mez abaciuchit dal cald e da la fatiga.
I avev fat or’d’bonora a la cava, e mò, a la trea dop’mez’dì, i s godev un po’ ‘l fresch e i s’arposav un po’ i ossi. I stev apena fora Fontia, pogh prima dla foza d’Ort’nov, ‘nt’una cà che a ciamarla cussì a si fev un cumpliment, da tant che ader scalamata, ma a lù a i tornav com’da, p’rcos i dizev che ader pù arent a le cave.
La vrità ader che a lù a i piazev d star lì p’rcos ier trop atacat a la caza, e lì ‘n mez al bosch com ier, i avre putut sparar anch da la finè.
Al parev d’es’r drent al forn dla Zopa, da quant ‘l cald i dev cl’dì lì, zù vers la Zona, nemanch ‘l fum i la fev a alzars, e i s stranav sui teci e su i campi com un linzol sporch.
La”vecia” al badav che ader un piazer, le zicade al parev che al fus’n pagate a cot’m da quant al cantav’n, mentr mosche e moscon iern a noze a s’ntir ‘l ramadan chi fev’n; tut a d’un trat al fù silenzi………Po’ i so do can, Bobi, e Dik, i cuminzar’n a abaiar e a tirar le catene com se i aves’n decis d strozars. Secò i fè apena a temp a star su, che i s’ntì un sgadinament ‘nt’una mazera a do pasi da lù, e dop nemanch un s’gond i vid pasar com nà s’cheza nà golpa con na gadina ‘n boca, che a s sbataciav a pù non poss.
Tut i sucess ‘nt’un lamp…Po’ tut i arven’s com prima.
Lù i fù su’bt fora da la grazia d Dio. E com!…A lù!….’L prim cazator d Fontia! Na golpa e s’er permisa d fari fora nà gadina da sot al nas!……..E no!……A n sarà! Al fù su’bt guera!
Con do salti i fù ‘n cà, i stacò ‘l cat’naz da la pareta, i piò nà brancata d cartuce, i arguaiò un stopaz e nà cartata d zolf’n, i ligò al guinzai, i can e via.
A la dovev pagar cara c’là b’stiaza lì, i avrè fat v’der lù chi ier Secò. ‘L bosch il conosev com le so sacoze, ier nat lì! I violi e i canalon che i ‘ndev’n da Mont’verd fin a la Maciazza e po’ su,su, ‘nsina ‘n Camp’cecina p’r lù i n’avev’n segreti.
I sapev anch che ‘nt’un canal che i sendev vers Fosson, aier semp’r stat nà tana d golpa, e lù ier cunvint che cla bruta bestia a s fus r’ndopiata propri li drent. Se al fus stat cussì ader bela che morta!
I s s’ntiv nà rabia drent  che ‘nveza d passar p’ri violi, i piav a tronch, su p’ri scurton, i saltav i pozi a pè pari, i stranav i bonacon e le mazere senza s’ntir nemanch le furate di prun ‘ntlè gambe. I merli, neri com ‘l cul d’un parol, i s levav’n ciociand, spav’ntati da tut quel fracass, ma lù ozi, i li mirav nemanch, tut piat da la so seta d v’ndeta.
Com Dio i vols i rivò ‘nt’el canal che i zercav, e d colp i ardov’tò ‘l Secò d semp’r, calm e posat.
I ligò i can a nà pianta e i ses ‘nt’l canal pian, pianin……..E i vid sub’t che i ‘nser sbaiat!
Su un bonacon nà piuma a s movev, lizera, lizera, i la piò, e i vid che ader stata strapata d fresch…..Ader fata.   I s mirò un po’ a la tonda e dop pogh i scuprì quel che i zercav. Mez r’mpiatat ‘nt’una mazera aier un buc, gross com nà pepelina.
I piò l stopaz, e con un stech i ‘nfricociò ‘nt’l buch pù ‘n fond che i potè, po’ i buto su ‘l zolf’n e i dè foch.
Un fum zad com ‘l zaf’ran che i dev ‘n gola e i fev lagr’mar i oci, i cuminzò a levars, e ‘n quatr e quatr’ot i avev rempit completamente ‘l buch. Con un salt Secò, i fù fora del canal, i sligò i can e i san’dò a apostar un po’ pù ‘nsù, dov, ‘nt’una grota aier nà f’sura che al cuminzav a fumar com un camin. Do s’gondi dop…..Ech che i can i cuminz’n a rugnar e a drizar ‘l pel ‘ntlà s’ciena, mentr i mirn fissi la f’sura………Ed ecla……Na testa rossa al fa ‘l tùtù
Un moment e sub’t a s’artir d scat. Secò i punt ‘l cat’naz  mentr i can i sbrain com diavli, al dev v’nir fora se a n vò murir sof’gata!…….Ech!... A sé decisa! Un salt e adè fora, scapar a n po’ p’rcos i can i l’ha ‘ncantonata scoprend i denti, e rugnand com lupi, ‘l dit d Secò o dovent bianch sul gridet; quand ech che dal buch i sort’fora do golpacioti…….I avran si e nò un mes, ien magri com ussi, e i s lament’n com un colonates ‘l dì dla quind’zina. Secò i s f’ermò, con un’url i arciamò i can che ‘l mir’n sbalurditi…Aprufitand del moment, la golpa al partì com un razz con i fioli al cul, a l’ndev che al parev pagata, e ‘nt’un s’gond a d’er bela e sparita.
Secò i arligò i can, i s mis l s’ciop a tracola a s’aviò vers cà. I do can i andev’n dret crodon, crodon con la coa tramez a le gambe.
Lù i s f’rmò un moment e i diss” cos’avet da mirarm cussì voialtri do? ‘L sciop iè vec e i mà fat Crist…avet vist nò?” Ma drent  d lù i s’ntiv na vuzina che al dizev..busard..Busard..Busard! Ma chissà p’rcos ier content d’esrl.

Volpi Mario