L lepr - carraraonline.com

L’altr dì, mentr a fev do pasi ‘n Marineda, a me pasat arent un calesino, ier tirat da nà cavadina bianca, tuta peda e osi da far pena, e d colp a mè arv’nut ‘n menta Archimè ‘l zop.
Archimè ier ‘l mè zi, e sicome ier nat con na gamba pù curta d c’d’altra, so pà i p’nsò d fari far ‘l m’stier del barozar, p’rcos “ i avrè caminat d ‘manch a pè” i dizev, e cussì al fù.
Ier me zii da parta d mà, e eravan anch vizin d cà squasi porta e porta, a stev’n ‘nt’una casona a Gat Ross, apena pasat la Provinciale.
I avev sposat na masesa, ma a n’er riusita a dari un fiol, cussì oltre a me, i avev sol altre tre pasion ‘nt’là vita, ‘l cavad, i bic’reti, e la caza.
‘L cavad, senza tropa fantasia, vist che ier ner, i d’avev ciamat Ner.
I er  un “’ngles” com i dizev lù, gross com na cà, e alt altretant, con nà s’cena larga com piaza Farini, me i primi tempi a d’avev un po’ d temenza a stari arent, ma po’, vist che ier bon com ‘l pan ai avev piat cunfidenza, e ai zirav a la tonda com se niente al fuss. A i portav da ber col sec, a i m’t’ev la museta quand ier ferm a s’p’tar che i caricas’n ‘l baroz, e ai lisav ‘l pel con la striglia quand ier ‘ntlà stada.
La s’gonda pasion i la curav tuti i di, e a n’er rar che a la sera i arv’nis a cà portat dal Ner, mez alopiat su le stanghe del baroz, imbriach pers, com nà giacheta.
Ma quand a s tratav dla caza i s trasformav, i  l’avev ‘nt’l sangu com nà malatia.
Ier arivat a far solamente i viazi d rena, p’rcos cussì, i stev tut ‘l dì vers Luni, e lì i potev s’ciop’tar quant i volev.
Difati, sot le stanghe del baroz, i avev ‘nciodat do tochi d tavla, com nà specie d caset, dov i potev r’mpiatar ‘l tizon a avancarica del dodz, che i s portav semp’r adret, ‘nt’un fiasch senza vesta i m’tev i padin, e ‘nt’una scat’lina d lamiera dal tè, aier la “marzona” che a n’er altr che polv’ra da cava mazinata fina.
Pù d’una volta, mentr a s’ndev o a s v’niv d’n Magra, i s f’rmav d colp, i tirav fora ‘l tiz e i m dizev con un fil d voza” o nin…Spet’m un s’gond, non t mov’r che aiò vist un vol d pivieri!” Dop pogh a s s’ntiv nà tronata, e un moment dop i rivav lù, zopè, zopè con l sc’iop t’nut d scoson e ‘l pivir mort ‘n catana.
I m’tev a post nicò e “ diùùù Ner!!” a s’arpartiv.
P’r lù la caza ader semp’r aperta, stata e ‘nvern, i s vantav d’aver amazat d nicò, esclus ‘l lepr.
Quel i mancav al cont, e ier un bocon che a ni riusiv ‘ngodar. Cussì quand un so client che i s’er a far na caseta ‘n Caniparola, i diss d’avern vist un propri li aret a cà, i d’v’ntò squasi paz da la contenteza. Pogh al mancò che i partiss p’r andar a zercarl sub’t, ma po’ a i mancò ‘l coraz, p’rcos pogh pù ‘l la a i stev un guardiacaza ‘ngnorant com ‘l grafi.
“Pazienza” i m diss “ Tant tra quindz dì a d’arepr la caza!”D sicur i fur’n i pez dì dla so vita, ‘l temp i n pasav mai e le ore a i parev’n pù lunghe che la Quares’ma, ma a la fin al vens ‘l gran moment!
I m sviò che ader apena la trea e mez, e anch se eravan d’agost, ader bui pist, me a ier mez r’tronat dal son com al po’ er’r un ninin d set’ani a c’d’ora lì.
A m dai na saquata al mus, na p’t’nata a la bel’e’mei, e sganasand’m da li sbadigi, a m set sul canon dla bicicleta d me zii, e azù che al ven Cason!
D’aria fresca a m fa st’rmulir, e oramai svei del tut a cuminz a mirarm a la tonda.
‘L vial iè desert, e cussì anch l’Aurelia, quand a rivan a Luni, un treno i s pass vizin con nà v’ntata, diret chissà ‘ndov, mentr noialtri a sian arivati.
Posat la bici contr a un poz, ‘l me zi i cuminzò a sligar il tiz da sot ‘l canon, e dop averl asugat da la guaza ‘l caricò col piomb gross, però senza ca’ps, p’rcos adè ancamò bui, po’ cussì a zech lum i m portò drent a un vignet. R’ndopiati dret a nà pareta d vigna asp’tav’n ‘l dì. Nà nebieta lizera al v’niva asù dal mar e a s stranav ‘nti campi com un coltron, ma eravan d’strata, e a ni la fev a alzars d’n tera pù d mez metr, e a d’armanev lì, com bambaza sporca. ‘N’tant le punte dlè cave a s cuminzav’n a stampar contr ‘l ciar.
I primi merli i cuminzav’n a strissar ‘n tì maz’ron, me zii i s frucò ‘n sacoza e i tirò fora do cap’deti che i mis sot ai can d’l s’ciop, fati com do martedeti, i li armò, e i m diss con un fil d voza:” t’l ved l camp d’erb medic chi davanti?……’L mè amich i mà dit che tute le matine ‘l lepr i pass d chi…A m’arcomand non t mov’r e fa silenzio che stavolta al f’rgan!”
I m’nuti i pasav’n lenti, e sia mè che me zii eravan tesi come le corde d’un viulin, ‘ntant al v’niv semp’r pù dì, la nebieta ader semp’r lì, e ‘l lepr ‘n s decidev a pasar, me un po’ delus a fè p’r stender la man p’r pizar na po’ d’ua, quand a vid me zii alzar pian, pian ‘l tiz e piar la mira.
I fè partir do s’ciop’tate talment arent da parer nà sola, da un buchet dla pareta me a vid solamente nà spolv’rata ‘nt’d’erba med’ca ,e un rumacion marunzin, po’ pù nient.
“Piat” i urlò me zii “cocon và a piarl d corsa!” Me un lepr a d’avev mai vist e quand dop aver saltat un fosset a rivò lì, a vid un lavor maron, agavugiat ‘n tera con la lingua fora che ier ancamò a tirar la lasa: “o zii” a diss “I ha le orece lunghe!” “ ‘N’p’cat?” I arspos lù “ iè un lepr! Port chi! Port chi!” “ ma i ha anch ‘l pel lungh!” A diss mè pogh cunvint” “A tò dit d portarl chì…Ma t sen sod èèè!” Ma a me qualcò a m’quadrav e aiardiss”ma i ha ‘l cularin!” Dop un s’gond d silenzi, me zi, i m diss” lass lì, lass lì…..Ven via!”
Quand a fust’n dov avev’n lasat la bici a ‘ncontrast’n un che i s sgosav a urlar.
I ciamav ‘l so cocherino, e i biast’mav com un turc, p’rcos ier dov’ntat dur e i ni dev pù reta.

Volpi Mario