L fiol del padron - carraraonline.com

Me a stevn ‘n Bonascla, ‘nt’una caseta  propi sot la Provinciale, e lù su p’r la via Fonda, ‘nt’un cason  ‘n mez a i campi, p’rcos sò pà, i fev ‘l mezadr p’r un notar d Massa.

Mè pà i lavorav a la cava, ma spes e volentera i ‘ndev a dar d man al pà d Vangì, e  anch mè mà ader sempr ‘n cà da lor p’r aiutar far qualcò, ‘n cambi  a s magnav lì, e a s portav a cà un po’ d v’rdura, dò fruti, na brancata d farina, e cussì via.

Un bel dì, eravan  ai ultimi d Setembra, la  Giò, che al sirè stata la mà d Vangì, al vens ‘n cà nostra, e al dis a me mà che la domenica dop a i sarè stat la vendemia, e sicome al v’niv anch ‘l padron con la so moia, a i sarè piazut che a l’ndes a far la stocafisata, p’rcos com a la fev lè, an la fev nisun, e lè al volev far bela figura con la padrona.

Cussì na stimana dop ech’s chi; ‘l sol i n’r anch spuntat che mè, mè pà, e mè mà, eravan ‘n camin com i tre Remagi* vers la cà d Vangì.

So pà, Faù i er ‘nzà tla stada a munzer, e mè pà i cuminzò subt a dari d man, entrati n cà, la Giò a s det ‘l bongiorno con na tazona d lat, e dò tochi d pan fat ‘n cà, spessi com un tav’lon, po’ al  piò da parta me e Vangì e a s dis “ ozi al v’nirà ‘l padron con la moia e sò fiol, a m’arcomand! Non fatm far dle brute figure, anzi al sirà mei che piast ‘n consegna ‘l fant e stass atenti che i ‘n s’abi a far di mali, fat’l svagar, ma con giudizi “ un discors cussì, dit a dò fanti d pogh pù d ot’ani i s fè gonfiar ‘l pet d’orgoi, senza contar po’che i s’evitav d coir i gran com a s fev sempr.

‘N’tant fora al cuminzav a nas’r ‘l dì. ‘L sol i metev fora la testa d dret a Pianamaz, ‘l gadet i cuminzav a cantar, ’nsema al merl drent al maz’ron, le rondne da drent la stada al spicav’n ‘l vol p’r ciapar i mus’lin che a s vedev badar tra ‘l lum e scur. Me pà e Faù i atacav’n i bò a la tragia, p’r portar la mastra e i bigonzi sot al montzed d Ripa, p’rcos al tocav cuminzar da li, p’r po’ sender vers le piane. Vers la seta al cuminzò a rivar anch  queli che i dovevn stacar, tuti fanti e fante del post, che la Giò al mis subt ‘n riga com un caporal con i soldati. A la ot al vens un machinon tut ner, al ses un, vestit com un general, che i reprì le porte a un’omet alt un metr e zero, gras com un porzed, e na signora tuta vestita d ross, col caped largh com na zista, piena d codane com un’albr d Natal, e subt dret, un ninin, grand com noialtri, muf com la zera, vestit da marinar che i s fè sciopar da le risate, pien com i er d nastrin e trinete. Pogh al mancò che Faù e la Giò i basas’n anch i pè da tant che i fevn i melensi con chi dò bagaronai lì, noaltri ‘nveza senza  far tante storie a s’avizinast’n al fant e mè a i dis” ciao, me a son  Guido, e luchì i è Vangì, te com t t ciam?”  Lù i s det n’ociata squasi spaventat po’ i diss  in italian “ mi chiamo Leopoldo. ”Pogh  al mancò che a m venis i strangugion da le risate, ma a fè finta d nient e a i dis “ven Leo, che a t fian veder ‘l post” Per tuta la matina al fest’n caminar com un raz, a i fest’n veder le vache, anch se lù i avev paura, i p’lin dret a la chiocia, al portast’n a magnar d’ua moscata, e quela corneta, p’r lù tut i er nov, quand po’ i fanti che i stacav’n, i cuminzar’n a dar adret a le fante, per  stupizari sul mus ‘l tintoret*i cuminzò a sganasars da le risate, tant che i arpiò anch  un po’ d color.

Quand al vens ora d magnar, ‘n s’ fè cumpantir e i fè fora un tof d polenta gros com na cà, afogata drent a un mar d stocafis al sug, a sera eravan amici p’r  la peda, ma  p’r lù ader ora d tornar a cà.

Al pasò un bel po’ d temp, eravan  ‘nzà sot a le feste d Natal, quand la Giò al dis a mè mà, che la signora  a d’avev chiest, che sicome ‘l fiol ier armas  content dla nostra cumpania, se al fusn state contente d mandars a cà soa un dì, prima dle feste d Natal.

A dir d si a fest’n ‘l foch, e cussì dop a pogh, lustri com do gelati, me e Vangì eravan pronti p’r ‘l grande viaz, ‘nfati p’r noialtri Massa, al dovev eser a c’d’altr cap del mond.

Dita e fata, dop un po’ che a spetav’n ‘n zim a la via, ech rivar la tomobile nera, a montari su avev squasi temenza, ma a m fè coraz e a m setò ‘n t’una poltrona d coi ross,  larga com ‘l mè  poz’let, Vangì  i n fiatav pù neanche, e i vens a setars arent a me, po’ il general i cios la porta e a partist’n.

I albri, i pali dla luce, e le cà al scapavn dai f’nstrin, mentre la machina  a s portav in silenzi vers  la cà d Leopoldo. Altr che cà!!!!  Ader pù alta del palaz dle scole d Punzimat, tut a la tonda un prat con un’erba che al parev piturata da quant ader precisa, con di albri che mè a na avev mai vist. Sul porton a spetars a ier Leopoldo con na signora tuta v’stita d ner, chisà? Forsi ader ‘n luto! I s salutò e po’ i s’acompagnò ‘n cà.

Me un lavor cussì a l’avev mai vist......Un salon grand com la piaza d M’lara, tut d marm bianch, con na scala tuta storta che al montav al pian d sopr, con na ringhiera d marm ner tuta ‘n mased, ‘n zim aier na statua d’un ‘om con un libr ‘n man, la so stanza po’ al parev  la cà  dla P’fana! Cavadi a dondolo, birili, sciopi, pistole, d tamburi po’ a i ner na sbarica, grandi e picli, a me e a Vangì a s cuminzò a zirar la testa a v’der tut c’l ben d Dio.

A piò un tambur, ma  a n fè a temp a pistari su che  Leo i m dis “ aspetta....Chiedo alla Tata se puoi suonare.” E mò, chi adè sta tata? A m diss tra me e mè, po’ a scuprì che ader quela v’stita a lut d prima. ‘Nsoma, per tut al tocav domandar a la tata, “ ma a ni è tò mà?” Ai diss, e lù i m r’spos che ader sempr  fora a far qualcò, so pà ‘l v’dev nà volta ogni morta d Papa, la sò vita ader sempr cios drent lì ,a dars da dir con la tata.

A zocast’n un po’, ma a noialtri a s mancav i pozi da saltar, i albri per rampicars, i maz’ron da r’mpiatars p’r zocar a guardie e ladri,  la via per far a le padine, o a piastra e latin, li al parev d’esr ‘n galera.

A sera, mentr la machina a s portav a cà, Vangì i m de na gomtat ‘nt’un fianch e i dis pian pianin p’r non far sentir dal genaral “ pov’r Leo.......Pens che sfurtuna eser nat  fiol d’un padron!!!”